शिवशक्ति नमुना आधारभूत विद्यालयमा तोडफोड, दोषीलाई कारबाहीको माग!

 कोहलपुर-२, प्रेमनगरस्थित शिवशक्ति नमुना आधारभूत विद्यालयको हाताभित्र अज्ञात व्यक्तिहरूले तोडफोड गरेको घटना सार्वजनिक भएको छ।

विद्यालय परिसरमा रहेका बिरुवा र धाराका टुटी अज्ञात व्यक्तिले भाँचेर क्षति पुर्‍याएको विद्यालयका प्रधानाध्यापक बर्दीप्रसाद सापकोटाले जानकारी दिएका हुन्।

प्रधानाध्यापक सापकोटाका अनुसार अज्ञात समूहले रातको समयमा विद्यालयको पर्खाल नाघी तोडफोड गरेको देखिएको छ। विद्यालय प्रशासनले घटनाबारे स्थानीय प्रहरीलाई जानकारी गराइसकेको छ भने अनुसन्धान अघि बढाइएको छ। विद्यालय जस्तो पवित्र स्थानमा गरिएको यस प्रकारको क्षति अपराधीक मानसिकताको प्रतिफल भएको भन्दै विद्यालय परिवारले यस घटनाको कडा निन्दा गरेको छ।

विद्यालय प्रशासनले विद्यालयको सुरक्षामा थप ध्यान दिनुपर्ने आवश्यकता औंल्याएको छ। "विद्यालय शिक्षालय मात्र होइन, भावी पुस्ता तयार पार्ने स्थल पनि हो। यहाँ यस्तो आपराधिक गतिविधि हुनु दुःखद् छ। घटनाको सत्यतथ्य छानबिन गरि दोषीलाई कानुनी दायरामा ल्याउन हामी सबैले सहयोग गर्नुपर्छ," प्रधानाध्यापक सापकोटाले भने।

स्थानीय बासिन्दा र विद्यालय व्यवस्थापन समितिले समेत घटनाप्रति गम्भीर ध्यानाकर्षण गराउँदै दोषी पहिचान गरी कानुनी कारबाही गर्नुपर्ने माग गरेका छन्। विद्यालय क्षेत्रको सुरक्षाका लागि आवश्यक उपाय अपनाइने प्रतिबद्धता विद्यालय प्रशासनले जनाएको छ। यसैबीच, स्थानीय प्रहरी चौकीले घटनास्थलको निरीक्षण गरी अनुसन्धान प्रक्रिया अघि बढाइसकेको छ। विद्यालय हाताभित्र कुनैपनि आपराधिक गतिविधि हुन नदिन स्थानीय समुदाय, विद्यालय प्रशासन, अभिभावक र सुरक्षाकर्मीबीच समन्वय आवश्यक रहेको विद्यालय व्यवस्थापन समितिले जनाएको छ।

विद्यालय प्रशासनले आगामी दिनमा यस्ता घटना नदोहोरिउन् भनेर विद्यालय सुरक्षाका लागि थप रणनीति अपनाउने तयारी गरिरहेको छ। दोषी पहिचान गरी कानुनी कारबाही अघि बढाउन सम्पूर्ण पक्षलाई सहयोग गर्न विद्यालय परिवारले अपिल गरेको छ।