जाजरकोट कुशे –७ का खम्बबहादुर सिंह १५ मतको फरकमा विजयी!

जाजरकोट, कुसे गाउँपालिका–७ मा सम्पन्न वडाध्यक्षको उपनिर्वाचनमा नेपाली कांग्रेसका उम्मेदवार खम्बबहादुर सिंह विजयी भएका छन्।

सिंहले ३४७ मत प्राप्त गरी निकटतम प्रतिस्पर्धी नेकपा (एकीकृत समाजवादी) का गोरख नेपालीलाई पराजित गरेका हुन्।

नेपाली कांग्रेसका सिंहले १५ मतको अन्तरले जित हासिल गरेका छन्। गोरख नेपालीले ३३२ मत प्राप्त गरेका थिए। त्यस्तै, नेकपा (एमाले) का उम्मेदवारले २५२ मत ल्याएका छन्। कुसे–७ को उपनिर्वाचनमा मतदाताको उत्साहजनक सहभागिता देखिएको थियो।कुल ९३१ मत खसेकोमा ३४७ मतसहित सिंहले जित हासिल गरेका हुन्।

निर्वाचनलाई स्वच्छ, निष्पक्ष र शान्तिपूर्ण बनाउन निर्वाचन आयोग तथा सुरक्षाकर्मीले उच्च सतर्कता अपनाएको थियो। यो उपनिर्वाचनले स्थानीय जनताको कांग्रेसप्रतिको विश्वास झल्काएको बताउँदै सिंहले आफ्नो जितलाई जनताको सेवाका लागि समर्पित गर्ने प्रतिबद्धता व्यक्त गरे। उनले वडामा शिक्षा, स्वास्थ्य, र पूर्वाधार विकासलाई प्राथमिकता दिने बताए। विपक्षी दलका उम्मेदवारहरूले जनताको अभिमतलाई सम्मान गर्ने बताएका छन्।

नेकपा (एमाले) का उम्मेदवारले आगामी दिनमा वडाको विकासका लागि सहकार्य गर्ने प्रतिवद्धता जनाए। यस उपनिर्वाचनले कुसे–७ मा राजनीतिक प्रतिस्पर्धा झल्काउनुका साथै लोकतान्त्रिक प्रक्रियामा जनताको सक्रिय सहभागिता देखाएको छ।